Macau - Day 1

起身，諗住整埋份Freelance先去玩...當然唔夠時間攪啦，之前太懶...

同huicheuk一齊出去，遲左5分鐘，各自貢獻HK$25俾遲到基金...

Polly果然守信用，冇爆到俾威哥聽，真係抵讚~

我呃左威哥去中港城陪我買羽絨，去到閘口即刻夾佢入去。見到佢反應都唔算大，幾順攤喎...可能佢自己都想"攪"野，哈哈...

就咁就開始左我地既澳門之旅，四條友 + 四張船飛 + 一間房...

過到澳門，check in埋都成5點半，即刻去氹仔食d野先；我地事前都冇咩planning架，都係周圍行下hae下咁。其實都冇咩好plan，澳門唔大，冇咩好做，都係飲飲食食入賭場。

遊遊下，行左上大三巴，計上次回到18歲之後，今次又回到17歲...

我地係大三巴下面玩猜樓梯。最尾先上到頂果個要係大三巴下面做10下掌上壓...第一個上到去既係huicheuk，跟住係JWong，最後淨番我同威哥...我曾經領先佢一大段，估唔到最後淨番我地兩個決勝負...好彩，最後我都能夠不負眾望將呢個表演機會讓俾威哥，哈哈哈！！

遊蕩完就梗係入賭場玩兩手啦。去左新賭場(永利)。入到去，淨下睇都睇左一個鐘，再研究下我地既strategy，最後人人夾5百，希望大家可以嬴番10萬8萬啦，哈。我自己就玩21點，開頭都食住個勢，之後轉左去同"醬爆"賭，以為佢個樣傻下傻下咁，同佢對賭佢實鋪鋪爆煲，點不知俾"醬爆"扮豬食老虎，俾佢殺到一頸血...

正係我同"醬爆"對賭既時候，JWong就係大細枱到試緊佢既運氣。我俾人据完之後join番埋一齊圍住張大細枱。我地用呢個長追單邊既戰術，因為我認為有d枱係會長開大或者長開細(lucky 6)，加埋JWong既氣勢，huicheuk既心水點數(777)，仲有威哥既沉默(因為佢一開聲就話買對沖，唔係就話開圍骰，佢一講呢d我地一定輸，所以我地唔俾佢出聲)。呢個戰術好有效，尤其是我地一齊話買7點跟住又真係俾我地中左，當時四條友仔係張賭枱到一齊嗌：yes！！夠晒誇張。最攪笑係我地雞仔注(最細注碼$100)，講野又大聲，人地幾千幾千咁賭都面不改容...真係好攪笑。如果我地夠膽加埋1,2,4,8戰術個result應該會好好。不過都好好彩俾我地遇到個明燈，有佢引路都幫左我地唔少。

我地係兩張賭枱中間遊走左不知幾多次，最勁既時候我地嬴左3K；玩左around 3粒鐘，一過左12點，大家都冇咩精神，JWong又冇曬氣勢，止賺走人。埋單嬴2K，嬴左船飛加酒店錢。

去碼頭接埋roger，佢要飲埋個friend餐喜酒先join我地，可惜佢又錯過左一次同我地一齊回到年輕既時侯...

其實我地賭左咁耐仲未食飯，接埋roger都成1點，5個人去搵野食，咁夜又唔識路，唯有問司機叫佢介紹下啦...去到一間叫南洋海鮮飯店，叫左串燒脆鱔，椒鹽瀨尿蝦，西蘭花炒螺片&瑤柱扒時蔬...d野食ok，不過埋單既時候竟然要成$13XX(我心目中諗住$900左右有找)，雖然都唔係差太多，但俾人咁据法感覺唔抵，所以大家要留意唔好去呢間野度食飯呀！！學JWong話齋：『冤枉錢黎，冤枉錢去...』雖然我唔認為係冤枉錢(係策略同守紀律既結果)，不過都冇計...

再落酒巴區飲野，本來諗住搵d好野益威哥，不過大家都心裡有數大家係邊類人...所以改變計畫，以令威哥行唔到直線為目標...

估唔到屈威哥不成，JWong第一個唔掂...仲諗住等威哥醉左酒後吐真言添...

估唔到威哥咁"堅"...

搭的士返酒店，5個人屈埋一間房，訓...