學友光年世界巡迴演唱會07

唔...唔算係超好，因為同期待既唔一樣...不過都好好睇~

揀左好多快歌...唔係唔好既，不過如果可以唱多d佢既經典就prefect...(太貪心la)

一開聲唱小城大事同天黑黑就覺得好正...

歌舞劇如果唱廣東話會投入d...如果多把女聲合唱應該會更加正...(做埋雪狼湖俾你睇好未！？)

如果．愛、在你身邊、妳的名字我的姓氏、離開以後、每天愛你多一些、藍雨、暗戀你、吻別、祝福...

仲有好多歌想聽...

late birthday

補祝︰細媽，生日快樂！！！

對話

陳媽咪︰『阿哥，你返工果度冇女仔架咩？』
阿哥 ︰『梗係冇啦。』
陳媽咪︰『cher，唔怪得你識唔到女仔啦...快d轉工，快d轉工...』
阿哥 ︰『...』
阿哥 ︰『咁你想要咩女仔？』
陳媽咪︰『最緊要人品好，其他就冇所謂...』
陳媽咪︰『人品好，個人就隨和...』
...

哈哈，佢開始擔心...

Week 4...奇蹟

真係奇蹟...如果唔係兩球護空門...如果唔係蘭尼...曼聯真係冇可能o係尋日打開今季勝利之門...踢得超差...

好彩...真係超好彩！！！

利記，車仔，阿記都分別嬴波...

上上落落

每日對住個市，唔係升就跌架啦...一係橫行...好無聊...(黃興桂！？)

* * *

同阿媽講左話想搬...哈哈，冇反對既聲音...應該會成為明年既計劃...好快就28！！！

唔該ME俾多幾單好野過黎，等我儲下錢先...

《CAN'T BUY MY LOVE》

登登登登...終於買左啦...哈哈哈！！！

不過買唔到電影soundtrack同埋goodbye day隻single...星期六要去信和搵搵...

嘩，竟然冇中文歌詞...Google又搵唔到...errrrr...如果有人search到既話留條link俾我...

一億個感謝！！！

Week 3...失望

雖然都預左...但真係好失望...

口講就話預左o者，心諗開季兩連和都夠谷底啦，應該係時候反底...有攻勢但入唔到波...仲要輸個咁既波...冇運冇運...下場仲要對熱刺添...

比艾力臣呢個貪錢怪嬴左打毗，見到佢真係想打鑊佢......

雖然阿記和波...利記車仔呢場大戰又打和...但都冇咩用，最失望始終都係曼聯自己唔爭氣...

利記都慘，輸球證，不過佢地咁多攻勢都拉唔開個比數班波都有DD責任...

醉

唔係我...

星期五同舊同事食飯，真係唔好意思啦，拉左佢地陪我飲酒...

飲左少少啦...各自歸家...正當我去到巴士站既時候，我見到巴士站有個女仔等緊巴士，突然間"啪"一聲灘左係地上面，佢又灘得幾"型"喎，好似訓覺咁既姿勢(仰臥)訓左係地上面...當然有幾個好心既人即刻上前幫手拍番醒佢...佢醒番，當然話自己冇事，多謝大家既關心，扶番佢起身之後...隔左都冇一分鐘，佢又"啪"一聲咁灘左係地上面，佢今次就冇咁好彩，面向下，個嘴擦損左少少...果幾個好心既人就梗係扶起佢，我提議俾佢坐係地上面先啦，等有車黎先再扶佢；之後另一個人就問佢洗唔洗送佢去醫院...咁佢就梗係話唔使啦，我心諗佢可能索左其他野，咁都冇計...等到巴士黎...扶左佢上車，大家都係N962...我落車果陣，仲見到佢訓係位，我諗佢都係去到總站等車長叫醒佢再算...

女仔既，都係小心d好，最好有人送你返屋企...醉左真係咩儀態都冇，好彩既就平安大吉；唔好彩既，touch wood講句，遇到幾個衰人，俾人"溶"左，真係上左頭條都唔知咩事...

《太陽之歌》

終於睇左啦...

因為一首歌，令我好想睇既電影...一如我所期待...

劇情都係果類啦...自己睇吧...

成套戲都有一種淡淡然既感覺，一貫日本電影既風格(其實我只係睇過幾套，全部都係愛情片)

雖然係咁，吸引既地方真係有好多...最鍾意一定Yui唱歌...搣面...

日本，呢個地方都好吸引...尤其係對香港人...

生活水平接近，生活繁榮熱鬧；熱鬧背後，又有一種小說既感覺，冇咁現實，多一點浪漫...加多份亞洲區既親切感...所以我都有呢份崇日心理...

一路睇一路諗，如果我地讀書時候，附近有海灘既話，我諗我都會走去學滑浪...因為型...


男主角話︰我都睇唔到自己既將來，讀完大學畢業，求求其其打份工過埋下半世就算...

大部人既生活就好似對住四塊牆，有幾可會有閒情逸志，望出窗睇下景...大部份都係高樓大厦，對住"視窗"好過啦...

冇夢想，真係好無聊...

我諗我都係繼續係電影裡面尋夢...


「我叫雨音薰，我喜歡音樂，我沒有男朋友...我最愛吃的香蕉是食物...」

即刻走去買soundtrack先得...早知叫mayyam係日本幫我搵搵啦...

因為電影既關係，鍾意左YUI，鍾意左佢既音樂...

無癮...

Week 2...

曼聯又和，仲未打開今季勝利之門...

C朗仲要做左紅牌阿姑...下場冇佢又冇朗尼...冇左2R既曼聯入唔入到波呢？

車仔又係落後既情況下反勝...

迪維斯俾我想像中好...希望佢下場有士哥~

加左個新書櫃

前兩日買左幾本書...

麻不甩 by 鄒凱光 - 因為每朝都會聽睛朗，行過書局，見到佢出書，拿起手揭兩揭，都幾岩feel喎...所以買左黎睇...

偽科學鑑證系列 by 小克 & 標童話集系列 by 楊學德 - 全部都係因為每期東tocuh都會連載佢地既漫畫，搞笑得黎又好有意思，亦都係我期期買東touch既原因之一。今次結集成書，一定要支持下...真係好好笑...

有興趣可以問我借黎睇...

* * *

隔離個書架係aNobii.com，同EditGrid一樣都係香港人Web2.0既產品，支持本地創作...

你害怕嗎？

有人問︰『仲有幾年就到(3字頭)，你唔驚咩？(識唔到女仔)』

我話︰『未驚過...』好有自信咁答...

從來都認為自己係一個"旬盤"，哈哈...所以未驚過；事實上，男人係可以擺耐o的o的既...

其實，我返而驚自己一事冇成多o的...

自從去完旅行返黎之後，都感覺唔到自己做過o的咩...

我諗大部份人都會想有一番作為(唔一定要搵到錢既)...自己亦都唔例外...

呢個時候，我就會問自己究竟我有o的咩強項呢？？？苦惱一陣...

咁有又咩興趣呢...又苦惱一陣...

之後一堆堆靠運氣既幻想就會走晒出黎...

最後就梗係冇結果啦...

每日返工放工，等月尾出糧，為左找卡數同埋儲錢去旅行...

有時又諗開開心心安安樂樂咁過日子都幾好丫...

咁既話...人生咪好無聊！？

噏左咁耐，都係希望提提自己唔係沉淪o係無聊上面...

雖然我一定會話︰『沉多兩日先啦...』

中左"懶"毒

返到屋企，咩都唔想做...

Moov'n & Sleep'n & Hae'n

梗有幾日係咁...

* * *

Manhattan Card可於8月20號優先預訂陳奕迅MOVING ON STAGE 1 演唱會...

英超開波啦！！！

等左好耐...英超返黎啦，又要為曼聯加油~

Week 1...

睇左謝拉特奇蹟地救返利記同加力查...阿記，車仔都岩岩嬴一球羅3分...

不幸地，只係得曼聯失分...好失望呀...季前所以傳媒都想像曼聯攻力是何等強勁...點知世事往往都係出人意表...被認為最強功力的球隊竟然入唔到波...

朗尼半場傷出，冇晒前鋒真係濕滯...唉...

唯一覺得安慰既係卡域克打得越黎越好...C朗依然保持水準...

now既服務真係做得幾好，分格同高清應該幾正(不過要俾錢既)，之但係講波果幾個就唔多掂啦...

Barcelona x Joey x Grasshopper

8號風球一收工，即刻要出動...

都係自由人好d，除左俾陳媽咪哦兩句之外都冇咩"壓力"...去左roger屋企飲埋支black label...鋤D輸左120隻...冇咩賭運...

訓左都唔夠6粒鐘，起身沖過涼要出街...巴塞場波改左14:30...望出窗都天氣都ok喎，起碼冇落雨...點不知出到CWB先有雨...不過照睇...

個位原來都幾好，尤其是落雨，有瓦遮頭...冇雨既話就梗係前D好啦...

角球位，坐o係細哨果邊...可惜佢冇咩插花，我地果邊又冇角球...JWong仲要坐左係南華教練米路隔離...

下午睇波，夜晚睇show...903拉闊Joey x Grasshopper...

正呀！！！

勁歌熱舞當然唔少得...阿細揀左兩首哥哥既快歌真係掂呀！搶晒風頭~




from MY903 FORUM

第一次搭機場快線...來回香港站都只係$42...好抵~

睇左一日，超攰...

估你唔到

明明所有風球除下，估唔到"帕布"咁好腰力，咁都可以拗返轉頭...就算返轉頭，頂隆都係3號風球，估唔到一個『藤原效應』，令到帕布變得成8號風球...

本來都幾好既，冇啦啦放早半日...如果係平時既話就係既...

平時既話最多只係去happy hour或者行下街，8號風球咪唔去law...之但係今晚買左飛睇巴塞...

開頭諗都幾開心，因為之前睇利物浦既時候知道個位唔多靚，新聞又話巴塞之前果兩場友賽hae踢...比賽取消退飛都幾好，但後尾又知道唔會取消而改第二日...

改期就麻煩啦，我第二日又撞左拉闊Joey X Grasshopper...唔通要二揀一？！

你鍾意鋼琴聲嗎？

如果鍾意，咁你一定會鍾意《不能說的秘密》...

鋼琴聲完全牽動到你既情緒...雖然首主題曲比起蕭邦果堆冇咁grand...但感覺好襯個劇情...

劇情都幾出人意表...感覺有少少似《觸不到的戀人》、《藉著兩點說愛你》；一部係Korean，另一部係Japanese...

主線劇情以外，有秋生同兩個"壞朋友"幫一幫，豐富好多同搞笑好多...

拍得好細緻...好多位都拍得好touching...好有feel...

一定要俾你個仔學音樂...如果我都識彈琴你話幾型呢...哈哈...


桂綸鎂靚唔靚，真係見仁見智...

如果一部電影好唔好睇導演要佔一個好大既比重，咁今次周杰倫都算唔錯...(其實我都唔知導演要做咩...)

渾左兩日...

快變成廢人

* * *

請自動彈開...

羨慕

真幾好羨慕你呀洪老闆...能夠朝住自己既目標不繼嘗試...

一步登天，不切實際...最岩我...懶...不思進取...逃避...

抵鬧...

典型既白羊

我份人，應該都幾容易被人睇穿...

遇到"新朋友"...真係岩唔岩feel一野就知...有時都好想迫自己去"妥協"...

但唔鍾意就真係唔鍾意，冇得解既...

其實唔了解我既人應該都會覺得我有時會幾串下，又闊佬懶理喎，態度惡劣，黑口黑面...見到我咁串，應該自己閃開彈埋一邊啦...

如果佢仲要係好煩果種真係想一巴車埋去...

真係既，如果岩feel既真係什麼兩協插刀，赴湯蹈火都完全冇問題...

唔岩feel既就真係...算把啦...

畫曬係塊面度...

情緒化既細路仔...

真係唔好迫我...

transformer x bicho x blush = sat

再睇左一次Transformer，因為有免費飛~

事實上都真係幾好睇既，變得好型...阿芝之前話個女角勁唔掂(當然唔係講身材啦)，再睇既時候都唔覺...我諗我都係唔多識講戲...

我諗...好睇在夠男人掛...純粹岩feel...

之後去左食日本串燒，環境唔錯；明太子茄子煮，柚子蝦沙律，荔枝豬肉卷，牛肋骨，備長冷烏冬，泡菜豬肉，白磨菇，白鱔，心太軟，cream brulee...樣樣都好味~ 我覺得都幾抵食~ CWB恆鑽26/F Bicho，推一推~

俾左錢...竟然冇咩點飲酒，仲好早閃人添...第一次咁蝕呀...anyway...Eli，HAPPY BIRTHDAY~

買多少少啦

『先生，你差少少就夠$xxx，咁就可以成為member，有八五折架...』

『先生，你差少少就會有份神秘禮物...不如再揀下先啦...』

『先生，你唔買多件？第二件有七折架喎...』

中晒計...

咁就星期五

悶到發癲呀...返工等放工...

都好彩，咁就黎到HAPPY FRIDAY...

浪費光陰呀...

巴士溫度

近排出街，搭親巴士都覺得好焗好熱...

夜晚搭勉強都可以...星期六日出街，架巴士坐滿人既話都咪話唔熱...

有日星期六搭出旺角，中午時段，架巴士都係半滿左右，不過已經覺得好焗，好似冇開冷氣咁...有其他乘客問司機可唔可以開大d冷氣，司機停左係屯門公路，上樓上睇睇，佢話政府依家規定左巴士冷氣只可以set定係某個溫度(唔知係咪25.5度)，佢想開大d都唔得...SHIT...

之後搭過既巴士都未試過唔焗既...

今晚搭962歸家...FULL既...又係好似冇冷氣咁...再係咁以後都唔使再搭巴士...

想鬧諗果班人都費事嘥氣...