Lucky You

因為Drew Barrymore，加上賭博呢個題材...我先會揀上呢套戲...

Drew Barrymore - 好明顯係因為《Music & Lyric》...我記得我岩岩睇完《Music & Lyric》之後，o係某隻DVD上面見到《Lucky You》既Trailer...我就一心諗住入戲院捧場...點知套戲好似冇係香港戲院上過...

套戲用賭局比喻人生...即使你既技巧幾高都好，係賭局入面總會遇上盲點...人生亦一樣，好多人都好執著；執著於金錢、執著於成就、執著於勝利、執著於過去...豁達少少，就會豁然開朗...

至於賭博，我好細個時老豆就教我賭錢...麻將、啤牌、十五糊、排九...(十五糊 & 排九真係唔識玩)，佢相信寧可俾佢教壞，總好過大過俾其他人教壞...小五既時候開始同佢賭棋局...由佢讓車馬炮2蚊局開始，去到無讓棋$10局...之後教埋家姐細佬一齊鋤D...佢好少帶我地出街玩，阿媽依家每次都會話佢從來唔帶我地出街玩...不過我地從來都冇怪過佢，生活逼人嘛...開賭成為我地屋企既娛樂...仲可以賺番多少零用錢...尤其係捉棋...哈哈哈！！！

依家我地屋企一年都會打幾次麻將既，不過自從家姐開始拍拖就打少左好多...細佬已經完全冇賭癮...基本上唔會再賭錢...最大賭癮當然係我啦，我依家仲會涉獵埋賭馬，同老豆多個話題，幫佢睇下賠率、賽果之類...

又講番套戲，成套戲最正既就係最尾Drew Barrymore果句說話...

被自己鍾意既人睇穿係一件好開心既事...

對我黎講，係一套好浪漫既電影~